Psixologiya Elmi-Tədqiqat İnstitutunun sədri, f.ü.f.d Elnur Rüstəmov və institutun əməkdaşları şəhid Ruhid İslamlının məzarını ziyarət ediblər.
Şəhidimiz Ruhid İslamlı 1999-cu il aprelin 1-də Lerik rayonunun Çeşman kəndində anadan olub.
Ruhid 2016-cı ildə Naxçıvan Dövlət Universitetində “Təhsildə sosial psixoloji xidmət” ixtisası üzrə təhsil alıb.
O, təhsilini bitirib, peşəkar psixoloq kimi çalışmağı arzulayırdı. Ruhid müxtəlif vaxtlarda Psixologiya Elmi-Tədqiqat İnstitutunda təşkil olunan seminarlarda, konfranslarda fəal iştirak etmişdi.
Ruhid 2020-ci ildə ali təhsilini başa vurduqdan sonra iyulun 29-da həqiqi hərbi xidmətə yollanıb.
2020-ci il sentyabrın 27-də başlanan Vətən müharibəsi zamanı Ruhid İslamlı gənc əsgər bölüyündən könüllü şəkildə ərizə yazıb və işğalda olan torpaqlarımızın azadlığı uğrunda döyüşlərə qatılaraq Talış kəndi və Suqovuşan istiqamətində döyüşlərdə xüsusi rabitəçi kimi xidmətini davam etdirib.
O, 2020-ci il oktyabrın 6-da müharibənin Suqovuşan istiqamətində gedən şiddətli döyüşlərdə qəhrəmancasına vuruşaraq şəhid olub.
Şəhid Ruhid İslamlı Bakı şəhəri Suraxanı rayonu, Dədə Qorqud qəsəbəsində yerləşən qəbiristanlıqda dəfn edilib.
Allah şəhidlərimizə rəhmət eləsin!
